អារ៉ាប់រួមចេញមុខបដិសេធថាករណីខ្យល់ព្យុះ និងគ្រោះទឹកជំនន់មិនមែនបណ្ដាលមកពីការបណ្ដុះពពកដើម្បីធ្វើឱ្យមានភ្លៀងធ្លាក់សិប្បនិម្មិតទេ
ទីក្រុងឌុយបៃ៖ អារ៉ាប់រួមចេញមុខបដិសេធថាករណីខ្យល់ព្យុះ និងគ្រោះទឹកជំនន់មិនមែនបណ្ដាលមកពីការបណ្ដុះពពកដើម្បីធ្វើឱ្យមានភ្លៀងធ្លាក់សិប្បនិម្មិតទេ។ ដូច្នេះ រដ្ឋាភិបាលសូមបញ្ជាក់ថានោះជាពាក្យចចាមអារ៉ាមតែប៉ុណ្ណោះ។ ជាក់ស្ដែង ប្រទេសអូម៉ង់មានអ្នកណាបាញ់ជាតិគីមីទៅលើអាកាសដើម្បីបង្កើតភ្លៀងសិប្បនិម្មិតម៉េចក៏អូម៉ង់មានខ្យល់ព្យុះ និងភ្លៀងធ្លាក់ខ្លាំងដែរ? ដូច្នេះសូមបងប្អូនកុំជឿតាមការបង្កើតព្រឹត្តិការណ៍បោក (hoax) ដើម្បីបានចំនួនចូលមើលនៅលើបណ្ដាញសង្គមរបស់គេ។
ប្រទេសអារ៉ាប់រួមនៅពេលនេះនៅតែមានទឹកជំនន់ដក់ជាប់នៅលើទីតាំងសំខាន់ៗមិនទាន់ស្រកទៅវិញអស់នៅឡើយទេ។ ជាពិសេស នៅទីក្រុងឌុយបៃ (Dubai), នៅតាមព្រលានយន្តហោះ និងនៅតាមដងវិថីសំខាន់ៗនៃទីក្រុងឌុយបៃមិនទាន់អាចដំណើរការឡើងវិញដោយរលូនទេ។ អ្នកខ្លះចេះតែនាំគ្នារិះគន់ថាមកពីអាជ្ញាធរបង្កើតភ្លៀងសិប្បនិម្មិត (Cloud Seeding)។
អ្នកគ្រប់គ្រងព្រលានយន្តហោះទីក្រុងឌុយបៃចាប់ផ្ដើមទទួលយន្តហោះពីខាងក្រៅឱ្យចុះចត។ ប៉ុន្តែជើងហោះហើររាងរអាក់រអួលបន្តិចដោយសារមានទឹកដក់នៅតាមថ្លុក។ តាំងពីថ្ងៃអាទិត្យមកម៉្លេះ ខ្យល់ព្យុះចាប់ផ្ដើមបោកបក់ទៅលើប្រទេសអូម៉ង់ (Oman) ដែលស្ថិតនៅជាប់នឹងប្រទេសអារ៉ាប់រួម។ នេះសបញ្ជាក់ឱ្យឃើញថាករណីប្រទេសអារ៉ាប់រួមទទួលរងខ្យល់ព្យុះ ហើយក្រោយមកមានភ្លៀងលាយខ្យល់កន្ត្រាក់ និងជំនន់ទឹកភ្លៀងនោះគឺដោយសារកត្តាធម្មជាតិ។
ដូច្នេះ ករណីអាជ្ញាធរអាចនឹងប្រើប្រាស់វិធីបង្កើតភ្លៀងសិប្បនិម្មិត ឬយ៉ាងណាវាគ្រាន់តែជាភាពចៃដន្យតែប៉ុណ្ណោះ។ វាមិនខុសពីសុភាសិតមួយដែលនិយាយថា «ទោះបីមាន់មិនរងាវក៏ថ្ងៃនៅតែរះ»។ មានន័យថាព្រឹត្តិការណ៍ទាំងពីរនេះគ្មានទំនាក់ទំនងគ្នាទេ។ បើទុកជាមានភ្លៀងសិប្បនិម្មិតក៏មិនដល់ថ្នាក់ជន់លិចទីក្រុងយ៉ាងល្ហាចល្ហឹមបែបនេះដែរ។ ជាក់ស្ដែង អាជ្ញាធរអះអាងថានេះជាការធ្លាក់ភ្លៀងខ្លាំងមិនធ្លាប់មាននៅក្នុងរយៈពេល៧៥ឆ្នាំចុងក្រោយ។
ចំណុចមួយទៀត អាជ្ញាធរបញ្ជាក់ថាខ្លួនមិនបានបាចម្សៅគីមីទៅលើអាកាសដើម្បីបង្កើតភ្លៀងសិប្បនិម្មិតនៅមុន ឬអំឡុងពេលមានខ្យល់ព្យុះ និងភ្លៀងធ្លាក់ខ្លាំងនោះទេ។ ដងវិថី និងផ្ទះរបស់អ្នកស្រុកជាច្រើនកន្លែងត្រូវជន់លិចដោយគ្រោះទឹកជំនន់លើកនេះ។ អាជ្ញាធរប្រកាសប្រាប់អ្នកធ្វើការនៅតាមមន្ទីរ-ក្រសួងនានា និងសិស្ស និស្សិតសូមស្នាក់នៅក្នុងផ្ទះជាបណ្ដោះអាសន្ន។ បើមិនអីចឹងទេ ពួកគេអាចប្រឈមនឹងគ្រោះថ្នាក់នៅពេលធ្វើដំណើរ។
ក្រុមអ្នកជំនាញយល់ថាការធ្លាក់ភ្លៀងខ្លាំងខុសពីធម្មតានេះបណ្ដាលមកពីការប្រែប្រួលអាកាសធាតុ និងការឡើងកម្ដៅខ្លាំងនៅលើភពផែនដី។ ជាក់ស្ដែង មិនមែនតែអារ៉ាប់រួមទេ សូម្បីតែនៅប្រទេសប៉ាគីស្ថានក៏មានភ្លៀងធ្លាក់ខ្លាំង និងរន្ទះបាញ់ខែចេត្រសម្លាប់មនុស្សរាប់សិបនាក់កាលពីថ្ងៃទី១២-១៤ ខែមេសាកន្លងទៅនេះ។ កាលណាធម្មជាតិប្រែប្រួលដូច្នេះនៅពេលមានភ្លៀងធ្លាក់គឺធ្លាក់ខ្លាំងដូចគេហែកមេឃ។ ដល់ពេលខែប្រាំងរីងស្ងួតហួតហែងខ្លាំងរហូតដល់ដីប្រេះបែកក្រហែងតែម្ដង។
ក្រុមអ្នកវិទ្យាសាស្ត្រគិតថាអាកាសធាតុប្រែប្រួលនឹងធ្វើឱ្យសីតុណ្ហភាពហក់ឡើងខ្ពស់, ធ្វើឱ្យមានសំណើមខ្លាំងនៅក្នុងបរិយាកាស និងធ្វើឱ្យកើតមានគ្រោះទឹកជំនន់កាន់តែខ្លាំងនៅតំបន់ឈូងសមុទ្រ។ សម្រាប់ប្រទេសខ្លះដូចជាអារ៉ាប់រួមជាដើមនឹងជួបប្រទះនឹងបញ្ហាទឹកជំនន់កាន់តែអាក្រក់ដោយសារគ្មានប្រព័ន្ធរំដោះទឹក។ បន្ទាប់ពីមានពាក្យចចាមអារ៉ាម និងការបង្ហោះតាមបណ្ដាញសង្គមថាគ្រោះទឹកជំនន់នេះបណ្ដាលមកពីការបង្កើតភ្លៀងសិប្បនិម្មិត រដ្ឋាភិបាលអារ៉ាប់រួមចេញមុខបដិសេធ។
អាជ្ញាធរទទួលបន្ទុកខាងបង្កើតភ្លៀងសិប្បនិម្មិតថ្លែងថាខ្លួនមិនទាន់ចេញយុទ្ធនាការបង្កើតភ្លៀងសិប្បនិម្មិតផងស្រាប់តែមានខ្យល់ព្យុះបក់បោកតែម្ដង។ ក្រោយមក មានភ្លៀងលាយខ្យល់កន្ត្រាក់ធ្លាក់មកយ៉ាងជោគជាំដី។ ប្រធានាធិបតីអារ៉ាប់រួមបានចេញសេចក្ដីប្រកាសមួយអំពាវនាវឱ្យមន្ត្រីថ្នាក់ជាតិ និងថ្នាក់ក្រោមជាតិប្រញាប់វាយតម្លៃសភាពការណ៍ និងឧបត្ថម្ភគាំទ្រទាំងស្មារតី និងផ្លូវចិត្តចំពោះបងប្អូនប្រជាពលរដ្ឋដែលរងគ្រោះដោយសារខ្យល់ព្យុះ និងគ្រោះទឹកជំនន់លើកនេះ៕
Post a Comment